Xitoy Xalq Respublikasi delegatsiyasining do‘stona tashrifi

Akademiya jinoyatchilikka qarshi kurash sohasida xalqaro hamkorlikning muhimligini tushungan holda chet davlatlar politsiya tashkilotlari vakillari bilan amaliy hamkorlikni kengaytirish va chuqurlashtirish borasidagi faoliyatini doimiy ravishda rivojlantirib kelmoqda. Bunday hamkorlik huquqni muhofaza qilish tuzilmalari bo‘lajak xodimlarining kasbiy tayyorgarlik darajasini oshirish borasida turli mamlakatlardagi hamkasblar o‘rtasida tajriba almashishning muhim vositasi hisoblanadi. So‘nggi yillarda Xitoy Xalq Respublikasi Jamoat xavfsizligi vazirligidagi hamkasblarimiz bilan hamkorligimiz faol rivojlanmoqda.

2011 yil 1 noyabr kuni IIV Akademiyasiga Xitoy Xalq Respublikasi Jamoat xavfsizligi vazirining yordamchisi Terrorizmga qarshi kurash departamentining boshlig'i Li Vey boshchiligidagi vakillar delegatsiyasi tashrif buyurdi. Delegatsiya bilan birga O‘zbekistondagi XXR elchixonasining vakillari – elchixona maslahatchisi Syuy Yunxay va politsiya attashesi Li Sinkan tashrif buyurdilar.

Akademiya boshlig'i polkovnik Sh.T.Ikramov delegatsiya bilan uchrashuvda hozirgi kunda keng tus olgan transmilliy jinoyatchilik, terrorizm, odam savdosi, qurol-yarog' va narkotiklarni g'ayriqonuniy muomalaga chiqarish, jinoiy daromadlarni legallashtirish kabi hodisalar dunyo miqyosidagi xalqaro muammoga aylanmoqda va ularga qarshi kurashish huquqni muhofaza qilish organlari, jumladan O‘zbekiston va Xitoydagi tegishli idoralarning sa’y-harakatlarini birlashtirish va yaqin hamkorlik qilishni talab etayotganligini ta’kidladi. Polkovnik Sh.T.Ikramov shu yilning may oyida Xitoyga ichki ishlar vaziri general-leytenant B.A.Matlyubov boshchiligida O‘zbekiston Respublikasi IIV delegatsiyasi tashrifi bo‘lib o‘tganini ham ta’kidlab o‘tdi. Vazirliklarimiz o‘rtasidagi hamkorlikning muhim yo‘nalishlari qatorida ichki ishlar idoralari kadrlari kasbiy tayyorgarligini takomillashtirish masalalari ko‘rib chiqildi. Xitoy Jamoat xavfsizligi xalq universiteti hamda O‘zbekiston Ichki ishlar vazirligi Akademiyasi o‘rtasidagi hamkorlik to‘g'risidagi Memorandumga imzo chekildi.

Uchrashuv davomida mehmonlar Akademiya faoliyatining asosiy yo‘nalishlari, Akademiyaning tuzilishi, ta’lim jarayonining tashkil qilinishi, ilmiy tadqiqot faoliyatining yo‘nalishlari bilan tanishdilar. Delegatsiya vakillarini Akademiya o‘quv-tarbiya jarayoniga zamonaviy axborot va telekommunikatsiya texnologiyalarini joriy etish masalalari qiziqtirdi. Amaliy muzokaralar doirasida O‘zbekiston va Xitoyda kadrlar kasbiy tayyorgarligini tashkil etishga oid masalalar ko‘rib chiqildi.

Tashrif chog'ida mehmonlar Akademiyaning moddiy-texnik bazasi bilan tanishdilar. Ular Innovatsion pedagogik texnologiyalar markazi, Test markazi, Kriminalistik poligon, kutubxonada bo‘ldilar. Jismoniy tayyorgarlik kafedrasidagi Akademiya sportchilarining namunali chiqishlari mehmonlarda katta qiziqish uyg'otdi.

Tashrif samimiy va do‘stona ruhda o‘tdi, delegatsiya a’zolari O‘zbekiston Respublikasi IIV Akademiyasida malakali kadrlar tayyorlash yuksak darajada tashkil etilganligini ta’kidladilar.