2011 yilning 16 noyabr kuni O‘zbekiston Respublikasi Ichki ishlar vazirligi Akademiyasi Murabbiylar Kengashining tashabbusi bilan ta’lim muassasasiga yangidan ishga kelib otaliqqa olingan xodimlar va ularning murabbiylari bilan mamlakatimiz tinchligi va osoyishtaligini saqlash uchun Ichki ishlar vazirligining mas’ul lavozimlarida uzoq yillar ishlab, ulkan hayot yo‘lini bosib o‘tgan va hozir jinoyatlarning oldini olish kafedrasida ta’lim berayotgan iste’fodagi polkovnik Anvar Qayumovich Devyatov bilan uchrashuv bo‘lib o‘tdi. Uchrashuvda Akademiya kafedra, bo‘lim va xizmatlarining taklif qilingan tajribali murabbiy xodimlari, o‘quv muassasasiga yangidan ishga qabul qilingan ofitser, serjant va safdorlar tarkibidan bo‘lgan xodimlar qatnashdilar.

Ma’lumki, hozirgi kunda yosh avlodni Vatanimizning munosib farzandlari bo‘lib yetishishlari uchun muqaddas an’analar, qadriyatlar ruhida yuksak ma’naviyatli qilib tarbiyalash davlat siyosati darajasiga ko‘tarildi. Shu munosabat bilan A.Q. Devyatov mazkur uchrashuvda o‘zining ichki ishlar idoralarida ishlagan yillaridagi murakkab, ammo qiziqarli va sharafli xizmati, ish jarayonida uchragan kutilmagan hodisalar, turli vaziyatlar hamda ularni bartaraf etish yo‘llari, hayotidagi boshqa ibratli voqealar haqida so‘zlab berdi. U ichki ishlar idorasi xodimi kasbi doimo mehnatsevarlik, sabot va matonatni, mardlik va jasurlikni talab qilishini uqtirgan holda, buning uchun shu sohada xizmat qilayotgan har qaysi xodimning, kim bo‘lishidan qat’i nazar, vijdon amriga bo‘ysunishi, kishilar bilan munosabatda samimiy, xushmuomalada bo‘lib, kasb madaniyati talablariga rioya etishi, tafakkurini boyitib borishi, qonunlar va normativ hujjatlarni, Vazirlikning kasbga doir buyruq va ko‘rsatmalarini puxta o‘zlashtirib, ularga qat’iy rioya qilishi kerakligiga alohida urg'u berdi.

A.Q. Devyatovning ta’lim-tarbiya va ma’naviyatni oshirishga doir qiziqarli va mazmunli suhbati amaliyotdan kelib, ilmiy-tadqiqot ishlari bilan shug'ullanayotgan yosh tadqiqotchilar hamda xizmatni endi boshlayotgan xodimlar uchun foydali nasihat, o‘git sifatida qadrlidir. Tadbir yakunida iste’fodagi polkovnik A.Q. Devyatovga gullar taqdim etilib, maroqli uchrashuv uchun chuqur minnatdorchilik bildirildi.