Bitiruv tantanasidan so‘ng Akademiya kriminalistik poligonining faoliyati boshlanishiga bag'ishlangan tadbir ham bo‘lib o‘tdi. Kriminalistika poligonining hududida avtomobil yo‘lining bir qismi, xonadon, choyxona, do‘kon, yordamchi xonalar maketlari jihozlangan, portlash joyining maketi, tegishli multimedia vositalariga ega sinfxona foydalanishga tayyor holga keltirilganligi, Akademiyaning kunduzgi ta’lim, Oliy akademik kurslar, Serjantlar tarkibini tayyorlash bo‘yicha oliy kurslar hamda Ichki ishlar organlari ofitserlarining malakasini oshirish fakultetida ta’lim olayotgan tinglovchi va kursantlarga yo‘l-transport hodisasi, bezorilik, o‘g'rilik, talonchilik, bosqinchilik, odam o‘ldirish, narkotik vositalar yoki qurol-yarog'larni noqonuniy saqlash jinoyatlari bo‘yicha tergov-tezkor guruhi tarkibida tegishli xodimning harakatlarini bajarishni, jinoyat izlarini topish, qayd etish va rasmiylashtirish usullarini, protsessual hujjatlar tuzish, hodisaning sodir bo‘lishiga oid tusmollar ishlab chiqish va tekshirish usullari hamda metodikasini o‘rgatish rejalashtirilayotgani haqida ichki ishlar vaziriga axborot berildi.

Ushbu tadbirda ichki ishlar vaziri, vazirlik sohaviy xizmatlarining rahbarlari, Akademiya professor-o‘qituvchilari hamda tinglovchi va kursantlari ishtirok etdilar.

Kriminalistik poligonning faoliyati bilan tanishish jarayonida ichki ishlar vaziri B.A.Matlyubov tayyorlangan shart-sharoitlardan Ichki ishlar idoralari ofitserlarining malakasini oshirish fakultetiga qayta tayyorlash va malaka oshirishga kelgan ichki ishlar xodimlarining kasb mahoratini oshirishda, ularning amaliy ko‘nikmalarini sinovdan o‘tkazishda ham kengroq foydalanish zarurligi, shuningdek kriminalistik poligonda shakllantirilgan ko‘nikmalardan har qaysi bitiruvchining ichki ishlar idoralarining amaliy faoliyatida erkin foydalana olishiga erishish, jumladan nafaqat ekspert-kriminalistika sohasi bo‘yicha, balki «Tergov faoliyati», «Tezkor-qidiruv faoliyati», «Jinoyatlarning oldini olish faoliyati» mutaxassisliklari bo‘yicha ta’lim olgan tinglovchilar ham hodisa sodir bo‘lgan joyda qoldirilgan izlarni topish, qayd qilish va protsessual rasmiylashtirish ko‘nikmalariga ega bo‘lishi shartligini va bu ishlarda kriminalistik poligonning ahamiyati kattaligini ta’kidladi.