2011 yil 22 noyabr kuni Akademiyada uchta yangi ta’lim markazi ochildi. Bu voqea YeXHTning O‘zbekistondagi loyihalar Koordinatori bilan hamkorlikda amalga oshirilayotgan "O‘zbekiston Respublikasi IIV Akademiyasida huquqni muhofaza qilish organlari uchun kadrlar tayyorlash tizimini takomillashtirishga ko‘maklashish" loyihasini rivojlantirishning navbatdagi bosqichiga yakun yasadi.

2007 yil may oyida imzolangan YeXHTning O‘zbekistondagi loyihalari Koordinatori hamda O‘zbekiston Respublikasi IIV Akademiyasi o‘rtasida hamjihatlik va hamkorlik to‘g'risidagi memorandumga muvofiq, mana bir necha yildirki, Yevropaning politsiya kadrlarini tayyorlash bo‘yicha tajribasini o‘quv yurtimizning ta’lim jarayoniga joriy qilishga qaratilgan katta dastur amalga oshirilmoqda. Ushbu dasturni bajarish doirasida Akademiyaning moddiy-texnika bazasini kuchaytirish va takomillashtirishiga katta e’tibor berilmoqda.

Ushbu hamkorlik natijasida Akademiyada Innovatsion pedagogik texnologiyalar markazi, Ta’lim televideniyesi markazi va o‘quv teleko‘rsatuvlari tizimi yaratildi, Akademiya xodimlari tomonidan tayyorlangan qator darsliklar, o‘quv qo‘llanmalari va ilmiy adabiyotlar nashrdan chiqarildi. YeXHTning O‘zbekistondagi loyihalari Koordinatori ko‘magida Akademiyaning YeXHTga kiruvchi davlatlar huquqni muhofaza qilish organlarining ta’lim muassasalari bilan aloqalari kengaydi. Ushbu loyiha rivojlanish va kengayishda davom etmoqda.

Bugun birdaniga uchta yangi ta’lim obyekti – tezkor qidiruv huquqi kafedrasi qoshidagi Narkotrafik va odam savdosiga qarshi harakat qilish bo‘yicha interfaol ta’lim markazi, kriminalistika kafedrasi qoshidagi Kriminalistik ekspertizalar o‘tkazish markazi hamda Akademiya bosh o‘quv binosi ma’ruza zallarining axborot-kommunikatsiya tizimi ochildi. Ushbu obyektlarni yaratish loyihasi Akademiyaning mavjud ehtiyojlardan kelib chiqqan holda bergan taklifi bo‘yicha YeXHTning O‘zbekistondagi loyihalari Koordinatori tomonidan moliyalashtirildi va amalga oshirildi.

Ochilish marosimida YeXHTning O‘zbekistondagi loyihalari Koordinatori Elchi Ishtvan Vensel, Koordinator ofisining xodimlari, Akademiya rahbariyati hamda professor-o‘qituvchilari ishtirok etdilar.

Tadbirda so‘zga chiqqan Akademiya boshlig'i polkovnik Sh.T.Ikramov, mazkur loyiha IIV Akademiyasi ta’lim jarayoniga o‘quv faoliyatini ta’minlovchi zamonaviy axborot-kommunikatsiya texnologiyalarini joriy qilishga yo‘naltirilganligini va uning pirovard maqsadi o‘quv mashg'ulotlarining sifatini oshirish, ma’ruza zallari va o‘quv-metodik xonalarni zamonaviy o‘quv-texnika vositalari bilan ta’minlash, ularni Akademiyaning yaxlit axborot-ta’lim makoniga birlashtirish ekanligini ta’kidlab o‘tdi. Akademiya boshlig'i bularning bari o‘quv jarayonini jadallashtirish, tinglovchilarning bilim olishini kuchaytirish va, nihoyat, bo‘lajak ichki ishlar xodimlarining kasbiy mahoratini oshirish imkonini berishiga ishonch bildirdi.

Loyiha doirasida ta’lim obyektlari eng zamonaviy texnika vositalari – kompyuterlar, proyektorlar, skanerlar, printerlar va boshqa asbob-uskunalar – bilan jihozlandi. Bu obyektlarning barchasida kompyuter tarmoqlari yaratilib, Akademiya lokal tarmog'iga ulandi.

EXHTning O‘zbekistondagi loyihalari Koordinatori Elchi Ishtvan Vensel «O‘zbekiston Respublikasi IIV Akademiyasida huquqni muhofaza qilish organlari uchun kadrlar tayyorlash tizimini takomillashtirishga ko‘maklashish» loyihasining amalga oshirilishi Yevropada xavfsizlik va hamkorlik tashkiloti jinoyatlarning oldini olish va jinoyatchilikka qarshi kurashish, huquqiy tizimni takomillashtirish, xavfsizlik va barqarorlikni ta’minlash, xalqaro aloqalarni mustahkamlash maqsadlarida O‘zbekiston Hukumati bilan amalga oshirayotgan samarali va amaliy aloqalarning misollaridan biridir.

Akademiya rahbariyati hamda professor-o‘qituvchilar tarkibi vakillari EXHTning O‘zbekistondagi loyihalari Koordinatori xodimlariga Akademiyamizning kasbiy tayyorgarlik tizimini takomillashtirishga qo‘shgan hissalari uchun chuqur minnatdorchilik bildirdilar va ushbu hamkorligimiz kelajakda ham shunday samarali rivojlanishiga ishonch bildirdilar.