2011 yil 25 noyabr kuni IIV Akademiyasining o‘quv poligonida Serjantlar tarkibini tayyorlash oliy kurslari 15-yig'in kursantlarining O‘zbekiston Respublikasi Ichki ishlar vazirligi faxriylari bilan uchrashuvi bo‘lib o‘tdi.

Tadbirda O‘zbekiston Respublikasi Ichki ishlar vazirligi Faxriylar kengashi raisining o‘rinbosari iste’fodagi general-mayor E.N. Norgitov, iste’fodagi general-mayor R.K. Karimov va Akademiya faxriylar kengashining raisi iste’fodagi polkovnik E. Q. Arifjonov ishtirok etishdi.

Faxriylar Oliy kurslar safiga qabul qilingan kursantlarga ichki ishlar tizimida bosib o‘tgan xizmat yo‘llari, ushbu sohaning mashaqqatli, ammo sharafli tomonlarini so‘zlab berdilar.

Faxriylar kursantlarga o‘z kasblarining fidoyisi bo‘lishlariga, kelajakda xizmat vazifalarini bajarishda uchraydigan har qanday to‘siqlarni sabot bilan yengib, yuqori martabalarga erishishlariga tilak bildirdilar.

Tadbir mazmunli o‘tdi, faxriylarning maroqli suhbatlari, bergan o‘gitlari kursantlarda juda katta taassurot qoldirdi.

Serjantlar tarkibini tayyorlash oliy kurslarining kursantlari nomidan so‘zga chiqqan 11-guruh kursanti I.I.Raximxo‘jayev faxriylarga qiziqarli uchrashuv uchun minnatdorchilik bildirdi.