2011 yil 4 dekabr kuni O‘zbekiston Respublikasi IIV Akademiyasining o‘quv poligonida Serjantlar tarkibini tayyorlash bo‘yicha oliy kurslar kursantlarining qasamyod qilish tantanasi bo‘lib o‘tdi. O‘zbekiston Respublikasi ichki ishlar vazirining o‘rinbosari polkovnik A.Sh. Mirzayev, vazirlik sohaviy xizmatlari va Akademiya rahbariyati hamda tantanali marosimga taklif etilgan mehmonlar minbarga ko‘tarildilar. Oliy kurslar boshlig'i polkovnik S.K.Tangirberdiyev kursantlar xizmat qasamyodini qabul qilishga tayyor ekanliklari to‘g'risida axborot berdi.

Akademiya boshlig'i polkovnik Sh.T.Ikramov tadbirni ochar ekan, kursantlar ta’lim muassasasida chuqur bilim olib, mutaxassislik sir-asrorlarini puxta o‘rganishlari uchun barcha shart-sharoitlar yaratilgani, keng va yorug' auditoriyalar, ma’ruza zallari, zarur texnika vositalari ular ixtiyorida ekanligini ta’kidladi.

Shundan so‘ng kursantlar Vatani, Xalqi va Prezidentiga sodiq bo‘lishga qasamyod qildilar.

Ichki ishlar vazirining o‘rinbosari polkovnik A.Sh. Mirzayev kursantlarni ushbu shodiyona bilan tabriklar ekan, quyidagilarni ta’kidladi: «Bugun siz, aziz kursantlar uchun hayotingizdagi eng unutilmas, hayajonli kundir, chunki ona Vatan oldidagi muqaddas burchingizni a’lo darajada bajarishga qasamyod qildingiz. El-yurt tinchligi va osoyishtaligini ta’minlashdek mas’uliyatli va sharafli kasbni tanlagan ekansiz, bunda sizlardan, avvalo metin iroda va yuksak kasb mahorati talab etiladi. Shunday ekan, ushbu bilim maskanida faqat a’lo baholarga o‘qib, Ichki ishlar vazirligi tomonidan bildirilgan yuksak ishonchni oqlashingiz va kelgusida xizmat vazifangizni bajarishda bor kuch-g'ayratingizni safarbar etishingizga ishonaman».

Tadbirda kursantlarning ota-onalari nomidan Bo‘riboyeva O‘lmasoy Ibroximovna, Akademiya professor-o‘qituvchilari nomidan Oliy kurslar yuridik fanlar sikli boshlig'i vazifasini vaqtincha bajaruvchi mayor Berdiyarov Shuhrat Namazbayevich, kursantlar nomidan Yuldashev Alijon Abdusalomovich so‘zga chiqdilar.

O‘zbekiston Respublikasi Ichki ishlar vazirligining Ashula va raqs ansambli xonandalari tomonidan ijro etilgan dilrabo kuy-qo‘shiqlar tadbirga xush kayfiyat bag'ishladi.