2011 yil 20 dekabr kuni O‘zbekiston Respublikasi IIV Akademiyasida psixologiya va kasb etikasi kafedrasi tomonidan “Ichki ishlar organlari xodimlarini kasbga tayyorlashning psixologik muammolari” mavzuida ilmiy-amaliy konferensiya o‘tkazildi. Mazkur konferensiyadan ko‘zlangan maqsad – ichki ishlar organlari xodimlarini kasbga tayyorlash bilan bog'liq masalalarni hal qilishda psixologik va axloqiy bilimlardan oqilona foydalana olish uquvlarini takomillashtirishdan iborat.

Konferensiyada Akademiya professor-o‘qituvchilari, o‘quv bo‘limi vakillari, jamoat xavfsizligini ta’minlash va jinoyatchilikka qarshi kurashishdagi dolzarb masalalar loyihasi xodimlari hamda kunduzgi ta’lim 1 va 4-o‘quv kursida ta’lim olayotgan tinglovchilar ishtirok etdilar. Psixologiya va kasb etikasi kafedrasi boshlig'i, dotsent R.M.Maxmudov konferensiyani kirish so‘zi bilan ochdi. 

Anjumanda “Ichki ishlar organlari xodimlarining huquqiy ijtimoiylashuvi”, “Ichki ishlar organlari xodimlarini kasbga tayyorlashda psixologik bilimlarning o‘rni”, “Ichki ishlar organlari xodimlarining kasbiy ko‘nikmalarini shakllantirishning psixologik asoslari”, «Ichki ishlar idoralarida kasbiy tayyorgarlik jarayonidagi ijtimoiy dezadaptatsiya» nomli ma’ruzalari bilan ishtirok etgan ma’ruzachilar ichki ishlar idoralari xodimlarini kasbga tayyorlashga oid dolzarb masalalarga alohida to‘xtalib o‘tdilar.

Akademiyaning kunduzgi ta’lim tinglovchilarining «Ichki ishlar idoralari xodimlarining kasb madaniyatini shakllantirishning o‘ziga xos xususiyatlari», «Ichki ishlar organlari xodimlarining kasbga psixologik moslashuvi», «Ichki ishlar organlari xodimlarini tayyorlashda kasbiy psixologik treninglarning o‘rni» larning mavzusidagi ma’ruzalari tinglandi.

Anjuman yakunida ko‘tarilgan masalalar yuzasidan ichki ishlar organlari xodimlarini kasbga tayyorlash, ta’lim-tarbiya tizimini takomillashtirishga qaratilgan taklif va tavsiyalar ishlab chiqildi.