2011 yil 30 dekabr kuni O‘zbekiston Respublikasi IIV Akademiyasida iqtisodiy fanlar kafedrasi tashabbusi bilan “Mamlakatning ijtimoiy-iqtisodiy rivojlanishini ta’minlashda kichik biznes va xususiy tadbirkorlikning o‘rni va ahamiyati” mavzuida davra suhbati o‘tkazildi.

Davra suhbatida Akademiya professor-o‘qituvchilari, jamoat xavfsizligini ta’minlash va jinoyatchilikka qarshi kurashishdagi dolzarb masalalar loyihasi xodimlari hamda kunduzgi ta’lim 3 va 4-o‘quv kurslari tinglovchilari ishtirok etdilar. Davra suhbatini iqtisodiy fanlar kafedrasi boshlig'i dotsent Sh.M.Rustamov kirish so‘zi bilan ochdi.

Tadbir ishtirokchilari kichik biznes va xususiy tadbirkorlik subyektlari o‘rtasida iqtisodiy va huquqiy munosabatlarni takomillashtirish zarurligini qayd etdilar, ushbu munosabatlarni rivojlantirishga oid dolzarb muammolarni tahlil qildilar, mamlakatning ijtimoiy-iqtisodiy rivojlanishini ta’minlash va iqtisodiy mustaqilligini mustahkamlashda kichik biznes va xususiy tadbirkorlikning ahamiyati va o‘rnini ta’kidlab o‘tdilar.

Akademiya tinglovchilari o‘z chiqishlarida mamlakatimizda tadbirkorlikni rivojlantirish, o‘rta mulkdorlar sinfini shakllantirish, ichki bozorni raqobatbardosh va sifatli mahsulotlar bilan to‘ldirish, yangi ish o‘rinlari yaratish va shu asosda aholi daromadlarini ko‘paytirish hamda farovonligini oshirish uchun qulay shart-sharoitlar mavjudligini ta’kidladilar.

Tadbir ishtirokchilari o‘rtasida samarali fikr almashuvi bo‘lib o‘tdi. Davra suhbati yakunida kichik biznes va xususiy tadbirkorlikni rivojlantirish va qo‘llab-quvvatlash, huquqni muhofaza qiluvchi organlar tomonidan tadbirkorlarning qonuniy manfaatlarini himoya qilish borasida olib borilayotgan chora-tadbirlarni yanada takomillashtirish, shuningdek bu sohada yuritilayotgan davlat siyosatining mohiyati va ahamiyatini yoshlarga tushuntirish yuzasidan muhim taklif va tavsiyalar ishlab chiqildi va ularni o‘quv jarayoniga joriy etish tavsiya etildi.