Ichki ishlar idoralarida o'tkazi-layotgan islohotlar samarasi o'laroq, respublika IIV Akademiyasi Serjantlar tarkibini tayyorlash bo'yicha oliy kurslarida har yili ko'plab kursantlar ta'lim olib, ichki ishlar idoralarning turli sohaviy xizmatlariga yo'llanma olyaptilar.

Respublika IIV Akademiyasi o'quv poligonida Oliy kurslar kursantlarining ichki ishlar idoralari xodimlari qasamyodini qabul qilishiga bag'ishlangan tantanali tadbir bo'lib o'tdi.

O'quv poligonining saf maydoni. Kursantlarning ota-onalari, yaqinlari, birodarlari hayajon bilan tadbir boshlanishini kutishyapti. Maydonda saf tortgan yigitlarning chehrasida mamnunlik, faxr va hayajon seziladi. Chunki bugun ular Vatan, xalq oldida qasamyod qilib, yurtda tinchlik, osoyishtalikni saqlash, fuqarolar xavfsizligini ta'minlash uchun butun kuch-quvvati, bilimini sarflash, kerak bo'lsa jonini fido qilishga ont ichishadi.

Tadbir boshlandi. Respublika Ichki ishlar vaziri o'rinbosari, polkovnik Sh. Ikramov, IIV Akademiyasi boshlig'i, polkovnik A. Yakubov va mehmonlar minbarga ko'tarildilar. IIV Akademiyasi Serjantlar tarkibini tayyorlash bo'yicha oliy kurslari boshlig'i, polkovnik S. Tangirberdiyev vazir o'rinbosariga shaxsiy tarkibning qasamyod qabul qilish tantanasiga saflangani haqida axborot berdi.

Tantanani IIV Akademiyasi boshlig'i, polkovnik A. Yakubov kirish so'zi bilan ochdi. U o'z so'zida mamlakatimiz rahbariyati tomonidan kadrlar tayyorlashga katta e'tibor qaratilayotgani, shu bois Oliy kurslarda ichki ishlar idoralari uchun malakali serjantlar tayyorlanayotganini ta'kidladi.

Shundan so'ng qasamyod qabul qilishga kirishildi. Iigitlar birin-ketin Vatanga, xalqqa sodiq bo'lishga qasamyod qildilar.

Qasamyod qabul qilish tugagach, respublika Ichki ishlar vaziri o'rinbosari, polkovnik Sh. Ikramov so'zga chiqib, kursantlarni vazirlik rahbariyati nomidan samimiy tabriklab, Oliy kurslarda o'tiladigan mashg'ulotlarni puxta o'zlashtirgan holda kasb sirlarini egallab, yurtimizda tinchlik va osoyishtalikni saqlash, jinoyatchilikning oldini olish, unga qarshi kurashish, fuqarolar hamda jamoat xavfsizligini ta'minlashda sidqidildan xizmat qilishga chaqirib, muvaffaqiyat tiladi.

O'qituvchilar nomidan podpolkovnik Zokir Umarov, ota-onalar nomidan Mashhura Olimova so'zga chiqib, bugungi qutlug' kun bilan yig'ilganlar va kursantlarni qizg'in qutladilar.

- Vatan, xalqimiz bizga ishonch bildirgan ekan, Oliy kurslarda bilimlarni puxta egallab, ichki ishlar idoralarining fidoyi, matonatli, jasur, hushyor xodimlari qatorida bor mahoratimizni yurt tinchligi va osoyishtaligini saqlash yo'lida sarflashga ont ichdik, - deydi kursantlar nomidan so'zga chiqqan Ravshan Ibragimov.

Kursantlarning ota-onalari, yaqinlari qo'llarida guldasta bilan ularni tabriklashga oshiqishadi. Quvonchdan ko'zlarida yosh, hayajondan entikib o'g'lini bag'riga bosib turgan ayol o'zini Jizzax viloyati Baxmal tumanidan Dilbar Jo'rayeva deb tanishtirib, shunday dedi:

- Yolg'iz o'g'lim Turg'unboy Jo'rayev bolalikdan ichki ishlar xodimi bo'laman, deb niyat qilardi. Kollejni bitirib, hujjatlarini mana shu dargohga topshirganda bir sevingandim. Bugun o'ktam yigitlar qatorida qasamyod qilganini ko'rib, boshim osmonga yetdi. Biz onalar uchun farzandlar o'z yo'lini topib, el koriga yarasa, katta baxt. Bularga bilim beradigan o'qituvchi, ustozlari omon bo'lishsin!

- Nevaram Murodjon ichki ishlar idorasida ishlayman, deb turib oldi, - deydi alp-qomat yigitlarga o'zgacha mehr-muhabbat bilan qarab turgan, o'zini Yodgor Mirobidov deb tanishtirgan keksa otaxon. - Ota-onasi xushro'ylik bermagandi. Bu katta savobli ish, yurt tinchligi uchun xizmat qilgan kam bo'lmaydi, deb oqfotiha berdim. O'qishga kiribdi, bugun qasamyod qabul qilishini eshitdim-u, o'zim ko'rib bir kuvonay deb keldim. Axir yigit omon bo'lsa, ko'rg'on bexatar deyishadiku. Ilohim hammalari salosht bo'lsin.

- Akam, Nuriddin Qo'chqorov qasamyod qabul qilyapti, - dedi Nishonboy ko'zlari quvnab. - Juda havasim kelyapti. Men ham kollejni bitirib, shu o'qishga kiraman, ichki ishlar idoralarida xizmat qilaman.

Tantanadan keyin kursantlar va mehmonlar uchun dasturxon yozildi. IIV Ashula va raqs ansambli xonandalari ijrosida kuy va qo'shiqlar yangradi.

Sadriddin SHAMSIDDINOV.

"Postda" gazetasi, № 19 (3809), 2009 yil 10 may