O'zbekiston Respublikasi IIV Akademiyasi ichki ishlar idoralari tizimlariga malakali mutaxassis-kadrlar yetishtirib beruvchi nufuzli ilm dargohlaridan biridir. Bitiruvchilarning o'z tanlagan sohalari bo'yicha haqiqiy bilimdonlar bo'lishi uchun o'quv dargohida barcha shart-sharoitlar yaratilgan. O'kuv yillari mobaynida olgan bilimlari, o'zlashtirgan ko'nikmalari, amaliyotda ularni ko'llay bilish mahoratini davlat imtihonlaridan oldin yana bir bor sinab, imtihon qilish maqsadida mana bir necha yildirki, Akademiyada «Final» tadbirini o'tkazish an'anaga aylangan.

Tadbir har bir yo'nalish bo'yicha maxsus tayyorlangan rejaga asosan o'tkaziladi. Belgilangan o'quv kompleks mashqlarini sifatli va amaliyotga bog'lagan holda o'tkazish, samaradorligini ta'minlash maqsadida maslahatchi sifatida ichki ishlar idoralarining tajribali amaliyotchi xodimlari jalb qilindi. Shuningdek, albatta, topshiriklarni olgan kursantlar ixtiyoriga zarur ilmiy adabiyotlar va qo'llanmalar, hujjatlar namunalari, turli yig'majildlar maketlari, texnik va boshqa vositalar havola etilgan.

Topshiriqlarda «Jinoyatlarning oldini olish faoliyati» mutaxassisligi bo'yicha bitiruvchilarning qiyin, favqulodda vaziyatlarda fikrlash qobiliyatlarini rivojlantirish, tezkor va to'g'ri qaror qabul qilish sifatlarini shakllantirish, ayniqsa, voyaga yetmagan shaxslar bilan muloqotga kirisha bilish, maishiy turmush sohasidagi turli nizolar oqibatlarining oldini olish, o'z vaqtida, adolatli hal qilish, muqaddam sudlangan shaxslarga ijtimoiy-huquqiy yordam ko'rsatish masalalarini ijobiy hal etish, fuqarolarning ariza-shikoyatlarini ko'rib chiqish kabi masalalar borasidagi bilimlari sinalsa, «Ekspert-kriminalistik faoliyat» yo'nalishidagi bitiruvchilar ekspertiza xulosalarini mustaqil ravishda to'liq va sifatli tayyorlash, tergov harakatlari va operativ-qidiruv tadbirlarida texnik-kriminalistik vositalarni qo'llash bo'yicha ma'lum amaliy ko'nikmalarni, eskpert-kriminalistik tadqiqotlarni o'tkazishda qonunchilik hamda normativ aktlarga amal qilish mahorati sinab ko'riladi. «Tergov faoliyati» mutaxassisligi bo'yicha o'tkazilayotgan mashg'ulotlarda jinoyat ishini qo'zg'atish, ushlab turish, voqea sodir bo'lgan joyni ko'zdan kechirish, so'roq qilish kabi ish jarayonlari bo'yicha bilimlar sinaladi. Tadbir davomida esa har bir bitiruvchi tomonidan o'rta hisobda yuzga yaqin protsessual hujjatlar tuziladi. Har bir topshiriq imitatsiyalar orqali amalga oshiriladi. Masalan, ommaviy tadbirlar o'tkazish chog'ida tinchlik va osoyishtalik, jamoat tartibini saqlash kabilar voqelikka yaqin tarzda bajarilishi ta'minlandi. - Bitiruvchilar topshirilgan vazifalarning ijrosi bo'yicha kun davomida hisobot berishi talab etiladi. Bajarilgan ishlar hay'at a'zolari tomonidan baholanadi. Tadbir so'nggida esa bitiruvchining umumiy bahosiga qarab xulosa chiqariladi, yuqori natijalarga erishgan bo'lg'usi xodimlar Akademiya rahbariyati tomonidan qimmatbaho sovg'alar, kitoblar, ilmiy adabiyotlar, ish hujjatlari yig'masi. Faxriy yorliqlar, pul mukofotlari hamda tashakkurnomalar bilan rag'batlantiriladi, - deydi IIV Akademiyasi kafedra boshlig'i, polkovnik D.Muhamadaliyev. - Yetarli reyting baholarini to'play olmagan bitiruvchilarga esa murabbiylar biriktirilib, ko'shimcha darslar, mashg'ulotlar o'tiladi. Mazkur jarayon har bir tinglovchining bitiruv imtihonlari oldidan bilimi va mahoratini sinab ko'rish imkoniyatini yaratadi.

- O'tkazilayotgan tadbir egallagan bilimlarimizni yana bir namoyon etib, hademay boshlanadigan amaliyot jarayoniga ijobiy ta'sir ko'rsatadi, - deydi 4-kurs tinglovchisi O.Haydarov. - Har bir topshiriqlarni bevosita tajribali xodimlar nazorati ostida mustaqil ravishda boshlar ekanmiz, albatta, hayajon bosadi. Ammo ularning dalda va ko'maklari, maslahatlari tufayli ishga kirishib ketganingizni payqamay qolarkansiz. Aytish mumkinki, mustaqil xizmatga kirishishimizda bu tadbirning o'tkazilishi ayni muddaodir.

«Final - 2010» tadbiri qatnashchilaridan Z.Mavlonov, A.Akbarov, D.Mirzayeva kabi tinglovchilar o'z tanlagan mutaxassisliklari bo'yicha yuqori reyting baholarini to'plab, bilim dargohi rahbariyatining Faxriy yorliqlari, qimmatbaho sovg'alari bilan taqdirlanishdi.

Muhabbat Minavvarova

"Postda" gazetasi, 2010 yil 13 mart, № 11 (3852)