Yosh avlodni Vatanga munosib yetuk mutaxassis xodimlar qilib tarbiyalash, ularga zamonaviy fan-texnika sirlarini mukammal o‘rgatish, yurt farovonligi, el tinchligi yo‘lida fidoyi insonlar bo‘lib yetishishini ta’minlash maqsadida O‘zbekiston Respublikasi IIV Akademiyasida bosqichma-bosqich o‘tkazilayotgan islohotlar o‘z samarasini bermoqda. Endilikda istiqlol farzandlari har jabhada o‘z o‘rinini topayapti, elga munosib, yurt kelajagi yo‘lida tashabbuslar ko‘rsatishmoqda.

Bularning barchasi zamirida davlatimiz tomonidan olib borilayotgan oqilona siyosat, Kadrlar tayyorlash milliy dasturi hamda «Ta’lim to‘g'risida»gi Qonun mujassam.

O‘zbekiston Respublikasi IIV Akademiyasi ham, ta’bir joiz bo‘lsa, kadrlar tayyorlashga ixtisoslashgan mustaqillik yillarining ilk qaldirg'och o‘quv dargohlaridan biridir. Bu yerda asosan huquq-tartibot, el osoyishtaligi yo‘lida taqdirini, kelajagini tikkan mard va jasur yoshlar ta’lim oladi.

Uning faoliyatiga nazar solganlar, albatta, bunga amin bo‘lishadi. IIV Akademiyasi Respublika Vazirlar Mahkamasining 1994 yil 2 sentabrdagi qarori va O‘zbekiston Respublikasi IIVning 1994 yil 20 oktyabrdagi buyrug'i asosida tashkil etilgan. O‘zbekiston Respublikasi qonunchiligiga muvofiq oliy ta’limning asosiy va qo‘shimcha kasbiy o‘quv dasturlari bo‘yicha ta’lim beradigan ixtisoslashgan oliy bilim dargohidir.

Prezidentimiz Islom Karimovning tashabbusi bilan mustaqillikningdastlabki yillarida tashkil etilgan IIV Akademiyasi ichki ishlar idoralari uchun malakali mutaxassislar tayyorlovchi yetakchi o‘quv yurtiga aylandi.

O‘kuv yurtida ilg'or ta’lim texnologiyalari keng qo‘llaniladi, o‘ziga xos pedagogik metodikalar ishlab chiqilib, o‘kuv jarayoniga tatbiq etiladi, ichki ishlar idoralarining faoliyati bilan bog'liq dolzarb nazariy va amaliy ilmiy-tadqiqotlar olib boriladi. Jamoa doimo ijodiy izlanishda bo‘lib, o‘z faoliyatining yo‘nalishlari va mazmunini takomillashtirib bormokda.

Qisqa davrda u mamlakatimizning yetakchi ta’lim muassasalaridan biriga aylandi va zamonaviy moddiy bazaga hamda katta ilmiy salohiyatga ega. Shu kungacha 14 mingdan ortiq malakali mutaxassislar tayyorlandi, 17 mingga yaqin ichki ishlar idoralari xodimlari qayta tayyorlash va malaka oshirish kurslarini o‘tashdi.

Yana bir jihati, IIV Akademiyasi huquqni muhofaza qiluvchi idoralar uchun mutaxassislar tayyorlaydigan Markaziy Osiyodagi eng yirik oliy o‘quv yurtlaridandir.

Dastlabki yillardanoq o‘quv jarayonini tashkil qilish tubdan qayta ko‘rib chiqildi: rejaga yangi fanlar kiritildi; namunaviy dasturlar va ular asosida darsliklar, o‘quv-metodik qo‘llanmalar, ma’ruzalar kurslari yaratildi; ta’lim jarayonining tizimliligi-ni ta’minlovchi normativ-huquqiy baza shakllantirildi.

1995-1997 yillarda o‘kuv jarayoni yanada takomillashib, tahririyat-noshirlik faoliyati sezilarli darajada jonlandi, tinglovchilar davlat tilidagi adabiyotlar bilan ta’minlana boshlandi.

1998 yil Akademiyada ta’lim tizimini tubdan isloh qilishning boshlang'ich bosqichi hisoblanadi. «Ta’lim to‘g'risida»gi qonun va Kadrlar tayyorlash milliy dasturiga muvofiq ishlar olib borilib, ilmiy-tadqiqot sohasi sezilarli darajada kengaydi, Doktorantura va ad’yunktura faoliyati ham jadallashib, o‘zbek huquqshunos olimlarining yangi avlodi shakllandi, Ichki ishlar idoralari uchun rahbar kadrlar tayyorlash fakulteti negizida Oliy akademik kurslar tashkil topdi. Zamon talablari va qo‘yilgan vazifalardan kelib chiqkan hamda xorijiy mamlakatlarning politsiya mahkamalari tajribalarini hisobga olgan holda, ichki ishlar idoralari ofitserlarining malakasini oshirish fakulteti ishida yangicha yondashuv karor topdi.

Prezidentimizning 2004 yil 19 iyuldagi Farmoni va Vazirlar Mahkamasining 2004 yil 23 sentabrdagi qaroriga asosan, IIV Akademiyasi tarkibida Serjantlar tarkibini tayyorlash bo‘yicha oliy kurslari tashkil etildi. Bundan ko‘zlangan asosiy maqsad ichki ishlar idoralari birlamchi bo‘linmalarining boshqaruvini ta’minlash, murakkab sharoitlarga moslashib, keskin vaziyatlarda to‘g'ri qarorlar qabul qila oladigan yuksak jangovar, axloqiy-ma’naviy, ruhiy fazilatlarga ega bo‘lgan serjant xodimlarni tayyorlashdan iboratdir.

Akademiya jamoasi ilg'or pedagogik texnologiyalar va o‘quv-metodik komplekslar asosida yuqori malakali yuristlar tayyorlashdek yuksak mas’uliyatli vazifaga munosib hissa qo‘shmokda.

IIV Akademiyasida ichki ishlar idoralari uchun «Jinoyatlarning oldini olish faoliyati», «Tergov faoliyati», «Tezkor qidiruv faoliyati», «Kriminalistik faoliyat» mutaxassisliklari bo‘yicha oliy yuridik ma’lumotga ega bo‘lgan yuqori malakali mutaxassislar tayyorlanadi. O‘qish tugaganidan keyin bitiruvchilarga oliy ma’lumot to‘g'risidagi diplom va «yurist» ixtisosligi, shuningdek, «leytenant» maxsus unvoni beriladi.

Ta’limning tarbiya va ichki ishlar idoralaridagi amaliy faoliyat bilan chambarchas bog'liqligi Akademiyada o‘quv jarayonini tashkil qilishning xususiyatidir. Mutaxassislar tayyorlash dasturiga nazariy ta’lim yakunlanishining har bir bosqichida o‘quv amaliyoti va stajirovka o‘tash nazarda tutilgan bo‘lib, ularning to‘rt yil mobaynidagi umumiy hajmi 19 haftani tashkil qiladi.

Ta’lim jarayonida tinglovchilarni pedagogik testdan o‘tkazish usuli keng ko‘llaniladi. Akademiyaning zamonaviy kompyuter texnikasi bilan jihozlangan test markazi bir vaqtning o‘zida 100 dan ortiq tinglovchini test sinovidan o‘tkazish imkoniyatiga ega va bilimining oshkora, xolisona baholanishini ta’minlaydi.

Umumiy kitob fondi 350 ming nusxadan ortiq o‘quv, ilmiy, maxsus, ijtimoiy-siyosiy va badiiy adabiyotlar hamda davriy axborot nashrlaridan iborat kutubxona ham tinglovchilar ixtiyoriga berilgan.

Ta’lim jarayonini tashkil qilish va amalga oshirish borasida Akademiyada to‘plangan tajriba respublika IIVga qarashli oliy ta’lim muassasalari ham keng ommalashtirilgan. Ta’lim jarayonini o‘quv-metodik ta’minlashni takomillashtirish borasida katta ishlar qilinmokda.

Birinchi bosqichda (1994-1997 yy.) respublika ichki ishlar idoralari tarixida ilk bor davlat tilida 50 dan ortiq namunaviy dasturlar, boshqa o‘quv-metodik materiallar, shuningdek, o‘quv jarayonini tashkil qilishga oid normativ-huquqiy baza ishlab chiqildi.

Ikkinchi bosqichda (1998-2004 yy.) «Ta’lim to‘g'risida»gi qonun hamda Kadrlar tayyorlash milliy dasturiga muvofiq ta’lim jarayoni tubdan qayta tashkil qilindi. Kadrlar tayyorlashning ikki bosqichli tizimi va yangi ta’lim standartlariga o‘tilishi munosabati bilan o‘quv rejalari, namunaviy dasturlar ishlab chiqildi.

Uchinchi bosqich (2004 yil sentabrdan boshlab) O‘zbekiston Respublikasi Prezidentining 2004 yil 19 iyuldagi Farmoni hamda O‘zbekiston Respublikasi Vazirlar Mahkamasining 2004 yil 23 sentabrdagi «O‘zbekiston Respublikasi IIV Akademiyasida ichki ishlar idoralari mutaxassislarini tayyorlashni takomillashtirish chora-tadbirlari to‘g'risida»gi qaroriga muvofiq ta’lim jarayoni «Jinoyatlarning oldini olish faoliyati», «Tergov faoliyati», «Operativ qidiruv faoliyati», «Ekspert-kriminalistik faoliyat» mutaxassisliklari bo‘yicha oliy yuridik ma’lumotga ega diplomli mutaxassislar tayyorlashga qaratildi.

Ichki ishlar idoralari uchun rahbarlar tarkibini tayyorlash 2004 yilda tashkil etilgan va IIV Akademiyasining mustaqil ixtisoslashgan ta’lim beruvchi bo‘linmasi hisoblanadigan Oliy akademik kurslarda amalga oshiriladi.

Mazkur kurslarning asosiy vazifasi ichki ishlar idoralari uchun yuksak kasb mahoratiga ega bo‘lgan, ma’naviy va axloqiy talablarga javob beradigan, jinoyatlarning oldini olish, huquq-tartibotni saqlash, jamoat xavfsizligini ta’minlash borasidagi faoliyatini tashkil qilish va boshqarishga qodir bo‘lgan rahbar kadrlar tayyorlashdan iborat.

Oliy akademik kurslarda ta’lim jarayoni maxsus ishlab chiqilgan dastur asosida amalga oshiriladi. U 12 oy mobaynida ta’limning kunduzgi shaklida bajarishga mo‘ljallangan.

Respublika IIV xodimlarining uzluksiz ta’limi tizimida ichki ishlar idoralari ofitserlari tarkibini tayyorlash, qayta tayyorlash va malakasini oshirish ichki ishlar organlari ofitserlarining malakasini oshirish fakultetida ta’minlanadi. Ushbu fakultet orqali ularning kasbiy bilimlarini chuqurlashtirish va yangilashni ta’minlovchi ixtisoslashgan tarkibiy o‘quv bo‘linmasi hisoblanadi.

Qisqa muddatli ta’lim jarayonida tinglovchilar yuridik fanlar erishgan zamonaviy yutuqlar, mamlakatimiz va xorijiy davlatlar huquqni muhofaza qiluvchi organlari jinoyatlarning oldini olish, ularni ochish, tergov qilish sohasida to‘plagan tajriba haqida bilim oladilar.

Mashg'ulotlarni o‘tkazishga nafaqat Akademiyaning professor-o‘qituvchilari, balki Ichki ishlar vazirligi, boshqa vazirlik va idoralarning rahbarlari hamda yetakchi mutaxassislari, shuningdek, ichki ishlar idoralarining tajribali amaliyotchi xodimlari jalb etilgan.

Ta’lim muddati tugaganidan keyin fakultet tinglovchilariga belgilangan namunadagi sertifikatlar beriladi.

O‘quv-tarbiya jarayonini metodik ta’minlash samaradorligini rivojlantirishda asosiy e’tibor tinglovchilarning ta’lim olishlarini faollashtirish, ilg'or pedagogik tajriba, o‘qitishning zamonaviy didaktik vositalari, axborot va telekommunikatsiya texnologiyalaridan foydalanishga asoslangan zamonaviy ta’lim usullarini joriy etishga qaratilmokda.

Shaxsiy tarkib bilan ishlash xizmati tizimiga tinglovchilar va kursantlarning kasbiy-axloqiy barkamolligini, ularda konstitutsiyaviy huquq, fuqarolarning erkinligiga rioya qilish prinsiplarini shakllantirishga qaratilgan tadbirlar majmui kiritilgan. U kasbiy yo‘nalish, o‘qishga nomzodlarni tanlash, kursantlar va tinglovchilarning xizmat faoliyatiga moslashuvlari, bitiruvchi tinglovchilarning kasbiy faoliyatga mustaqil yondashishlarini o‘stirishga qaratilgan.

Bu borada guruh rahbarlarining o‘zlariga bo‘ysunuvchi xodimlarning, professor-o‘qituvchilar tarkibining tinglovchilar va kursantlar bilan olib boradigan yakka tartibdagi tarbiyaviy ishlari alohida o‘rin egallaydi. Tinglovchilar bilan siyosiy-ma’rifiy mashg'ulotlar maqsadga yo‘naltirilgan holda samarali o‘tkazilmoqda.

Tarbiyaviy jarayonning yana bir asosiy yo‘nalishi kursantlar, tinglovchilar va xodimlardan saylangan ijtimoiy tuzilmalar faoliyatini yuksaltirishdir. Ular Akademiya rahbariyatiga jamoada sog'lom ma’naviy-ruhiy muhitni saqlab turishda sezilarli yordam ko‘rsatmokda. Ijtimoiy tuzilmalar tizimiga quyidagilar kiradi: faxriylar kengashi, kuratorlar kengashi, murabbiylar kengashi, xotin-qizlar kengashi, tinglovchilar va kursantlar kengashi, odob-axloq sudi shular jumlasidan.

Tinglovchilar o‘rtasida o‘quv va xizmat intizomi, tarbiyaviy ishlarni tashkil etish hamda kurs rahbarlari, o‘qituvchilar tarkibi bilan munosabatni shakllantirish bo‘yicha ijtimoiy-ruhiy ahvol muntazam monitoring qilib boriladi.

Shaxsiy tarkibni tarbiyalash shakllaridan yana biri tinglovchilarni otaliq ishlariga jalb qilishdir. Mana, bir necha yildirki, o‘quv yurti Toshkent shahridagi 21-Mehribonlik uyida tarbiyalanayotgan bolalarni otaliqqa olgan. Tinglovchilar va o‘qituvchilar bu yerdagi tarbiyalanuvchilarga har tomonlama yordam ko‘rsatmoqda.

Kursant va tinglovchilar tarbiyasida tantanali marosimlar alohida o‘rin egallaydi. Ichki ishlar idoralari xodimlarining qasamyodini qabul qilish, yosh mutaxassislarning bitiruv tantanasi, yangi o‘quv yilining boshlanishi, mukofotlanganlarni saf oldida takdirlash - bularning hammasi ularning kasbga muhabbatini shakllantirishga qaratilgandir.

Manaviy-ma’rifiy ishlarda Akademiyaning 1999 yilda tashkil etilgan Tarixiy-huquqiy muzeyi alohida o‘rin tutadi. Bu yerda davlatimiz tarixi, ota-bobolarimizning huquqiy merosi, ichki ishlar idoralariga kadrlar tayyorlash tizimining shakllanish tarixiga oid juda ko‘p eksponatlar va materiallar yig'ilgan.

Ushbu dargohning ilmiy-tadqiqot faoliyati qonuniylik, huquq-tartibot va jinoyatchilikka qarshi kurash hamda inson huquqlarini ta’minlash, olingan natijalarni amaliy faoliyatga joriy etishga yo‘naltirilgan, Istiqlol yillarida o‘z ilmiy maktabimizni yaratish va o‘zbek olimlarining yangi avlodini shakllantirish zarurati yuzaga keldi. Bugun IIV Akademiyasida 16 nafar fan doktori va 86 nafar fan nomzodi, jumladan, 10 nafar professor va 48 nafar dotsent samarali faoliyat ko‘rsatadi.

Mamlakatimiz qonunchiligini shakllantirishda Akademiya huquqshunos olimlarining ham ulkan hissasi bor, Jumladan, olimlarimiz O‘zbekiston Respublikasining Konstitutsiyasi, Jinoyat kodeksi, Jinoyat-protsessual kodeksi, Ma’muriy javobgarlik to‘g'risidagi kodeksi, Jinoyat-ijroiya kodeksi, Soliq va Bojxona kodekslari va boshqa normativ-huquqiy hujjatlar loyihalarini ishlab chiqishda faol ishtirok etdi.

Yuqori malakali ilmiy-pedagogik kadrlar tayyorlash Akademiya faoliyatining ustuvor yo‘nalishlaridan biridir. Nomzodlik va doktorlik dissertatsiyalari ustida ishlayotgan tadqiqotchilar, ad’yunktlar, doktorantlar soni yildan yilga ortib bormokda.

Ilmiy-tadqiqot faoliyatiga iqtidorli tinglovchilarni jalb etishga alohida e’tibor qaratilgan, Ijtimoiy-gumanitar, umum-kasbiy va maxsus kafedralar qoshida tinglovchilarning ilmiy to‘garaklari ishlab turibdi.

Huquqni muhofaza qilish faoliyatini normativ-huquqiy ta’minlashni takomillashtirishga qaratilgan ilmiy tadqiqotlarning natijasi tahririyat-noshirlik faoliyatida namoyon bo‘lmokda.

Akademiyada mustaqillik yillarida 1453 nomdagi adabiyotlar, jumladan, 60 ga yaqin darslik, 40 qa yaqin ma’ruzalar kurslari, 350 dan ortiq o‘quv qo‘llanmalari, 74 ta monografiya, 21 ta ilmiy maqolalar to‘plami, 22 ta ilmiy-amaliy va ilmiy-nazariy konferensiya, seminarlar materiallari, 900 ga yaqin o‘quv-metodik va boshqa nashrlar chop etildi, O‘quv jarayoniga zamonaviy axborot va pedagogik texnologiyalar hamda huquqni muhofaza qilish xodimlarini tayyorlash borasidagi ilg'or xalqaro tajribani joriy etish bo‘yicha innovatsion pedagogik va axborot texnologiyalari tatbiq etilmoqda.

Innovatsion faoliyat pedagogik jamoa oldida turgan ustuvor vazifalardan biridir. Shu bois ushbu faoliyatni metodik ta’minlash va ta’lim dasturlariga yangiliklarning joriy etilishini kuzatib borishda Akademiya Innovatsion pedagogik texnologiyalar markazi yetakchi o‘rin tutadi.

Markaz faoliyatining asosiy yo‘nalishlari - innovatsion pedagogik texnologiyalarni ishlab chiqish va ularning ta’lim jarayoniga joriy etilishiga ko‘maklashish, Akademiya va boshqa oliy o‘kuv yurtlari o‘qituvchilarining malakasini oshirish, endi ish boshlayotgan o‘qituvchilarni ilmiy, pedagogik ishlarga tayyorlash, xalqaro hamkorlik hamda politsiya xodimlarini tayyorlashning xorijiy tajribasini integratsiyalash bo‘yicha dastur lar doirasida ilmiy-pedagogik loyihalarni chet el o‘quv yurtlari bilan ilmiy va birgalikda amalga oshirishdir.

O‘kuv jarayonini jadallashtiruvchi innovatsion axborot texnologiyalari ham keng qo‘llaniladi. Axborot texnologiyalarini o‘quv jarayoniga joriy etishning asosiy vazifasi va pirovard maqsadi - Akademiyada barcha o‘quv, ilmiy-metodik resurslarni birlashtiruvchi yagona axborot-ta’lim makonini yaratish, ulardan tinglovchi, professor-o‘qituvchilarning foydalana olishlarini ta’minlashdan iborat. Ushbu maqsadda lokal kompyuter tarmog'i tashkil etilgan bo‘lib, u tarkibiy bo‘linmalarning ta’lim resurslarini birlashtirishga xamda undan tinglovchi va xodimlarning foydalanishlariga imkon beradi.

Tinglovchilar va professor-o‘qituvchilarning internet orqali xalqaro ta’lim resurslaridan foydalanishlarini ta’minlash borasida ham katta ishlar qilinayapti.

Jinoyatchilikka qarshi kurash soxasida xalqaro hamkorlikning muhimligi xalqaro tashkilotlar bilan amaliy hamkorlikni kengaytirishga e’tiborni kuchaytirmokda. Shu sababli Akademiya Yevropada xavfsizlik va hamkorlik tashkiloti, YeXHTning O‘zbekistondagi loyihalar koordinatori, YeXHTning Strategik masalalar bo‘yicha politsiya faoliyati bo‘limi, BMTning Jinoyatchilik va narkotiklar bo‘yicha Markaziy Osiyo hududiy boshqarmasi vakolatxonasi, BMTning Qochoqlar ishlari bo‘yicha Oliy komissari boshqarmasi, BMTning Taraqqiyot dasturi, Xalqaro Qizil Xoch, Fridrix Ebert nomidagi fond, xorijiy mamlakatlarning O‘zbekistondagi elchixonalari va boshqa xalqaro tashkilotlar bilan yaqindan aloqa o‘rnatgan.

Shular qatorida bir qator xorijiy mamlakatlarning ta’lim muassasalari va huquqni muhofaza qiluvchi idoralari bilan ham mustahkam aloqalar yo‘lga qo‘yilgan. Bunday hamkorlik bo‘lajak xodimlarning kasbiy tayyorgarligini oshirish sohasida sheriklar orasida tajriba almashishning muhim vositasi hisoblanadi, Akademiya xodimlari ilg'or tajribalarni o‘rganish maqsadida Avstriya, Vengriya, Germaniya, Irlandiya, BAA, AQSh, Turkiya, Fransiya, Chexiya, Shvetsiya, Yaponiya va boshqa qator davlatlarning politsiya ta’lim muassasalarida bo‘lishgan, Bundan tashqari, MDH mamlakatlari Ichki ishlar vazirliklarining oliy ta’lim muassasalari bilan hamkorlik qilinadi, shuningdek, MDHga ishtirokchi davlatlar IIV (politsiya) oliy ta’lim muassasalari uyushmasi tarkibiga kiradi.

Delegatsiyalar almashinuvi doirasida o‘rganilgan xorijiy mamlakatlarning o‘quv yurtlari va politsiyasi faoliyatidagi ilg'or tajribalar, kadrlar tayyorlashning shakl va usullarini takomillashtirishda muntazam qo‘llaniladi.

Oliy o‘quv yurtining xalqaro faoliyatida YeXHTning O‘zbekistondagi loyihalar koordinatori bilan hamkorligi muhim o‘rin tutadi. Bir necha yildirki, «O‘zbekiston Respublikasi IIV Akademiyasida huquqni muhofaza qilish idoralari uchun kadrlar tayyorlash tizimini takomillashtirishga ko‘maklashish» loyihasi doirasida Akademiya ta’lim jarayoniga politsiya kadrlarini tayyorlashning Yevropa tajribasini implementatsiya qilish bo‘yicha katta dastur amalga oshirib kelinmokda.

Ushbu loyiha ilg'or informatsion va pedagogik texnologiyalarni, huquqni muhofaza qilish organlari uchun xodimlar tayyorlashning xalqaro tajribasini o‘quv jarayoniga tatbiq etishga, moddiy-texnik bazani zamon talablariga mos ravishda takomillashtirishga yo‘naltirilgan.

BMTning Jinoyatchilik va narkotiklar bo‘yicha Markaziy Osiyo hududiy boshqarmasi vakolatxonasi bilan «Hududiy hamkorlik, hamjihatlik to‘g'risidagi memorandum ishtirokchilari bo‘lgan davlatlarda narkotiklar nazorati bo‘yicha huquqni muhofaza qilish faoliyatida interaktiv kompyuterlashtirilgan ta’lim» loyihasi doirasida ham sheriklik aloqalari faol rivojlanib bormoqda. Ushbu maqsadda Akademiyada tegishli yo‘nalishda interaktiv kompyuterlashtirilgan ta’lim tizimiga ega o‘quv markazi yaratilgan.

Ichki ishlar idoralarining xodimlarini jismonan sog'lom, jamoat xavfsizligini ishonchli himoya qilishga qodir, yuksak axloqiy prinsiplarga ega komil insonlar qilib tarbiyalash Akademiya oldidagi bosh maqsadlardan biri. Shu bois kursantlar va tinglovnilarning sog'lig'ini mustaqkamlashga alohida e’tibor qaratiladi.

Buning uchun bu yerda zamonaviy sport infratuzilmasi shakllantirilgan. Futbol, yengil atletika stadioni, gimnastika shaharchasi, suzish basseyni, tennis korti, o‘yinlar uchun mo‘ljallangan zal va ikkita kurash zali mavjud. Shuningdek, sambo va dzyudo kurashlari, xizmat ko‘pkurashi, yengil atletika, futbol, voleybol, qo‘l jangi, yunon-rum, erkin kurash seksiyalari ham ishlab turibdi. O‘quv mashg'ulotlarini yuqori malakali mutaxassislar olib borishadi. Ular orasida sport ustalari, mintaqa va jahon chempionatlarining g'oliblari, sovrindorlari bor.

Sportchilar O‘zbekiston milliy terma jamoalar tarkibida jahon va Osiyo chempionatlarida qatnashib, sambo, dzyudo, taekvando, boks, og'ir atletika, yunon-rum erkin kurash turlari bo‘yicha 350 ta, jumladan, 60 dan ortiq oltin medalni qo‘lga kiritishgan. Turli yillarda sambo kurashi bo‘yicha Akademiya xodimlari va tinglovchilaridan Yu. Yankina, Ye. Zaytseva, M. Kadirova, Ye. Tulupova, B. Xo‘jayev, A. Qurbonov, E. G'ulomov, D. Qambarova, erkin kurash bo‘yicha - tinglovchi M. Ibadov Jahon va Osiyo chempionlari bo‘lishgan. Shuningdek, D. Aripov (yunon-rum kurashi) R. Kutuyev va Sh.Ibragimov (karate), L. Li, A. Kim va M. Nogay (taekvando) Jahon va Osiyo chempioni unvoniga sovrindori, B. Usmonov og'ir atletika bo‘yicha Osiyo chempioni bo‘ldi. Akademiya jismoniy tayyorgarlik kafedrasining xodimi Akobir Qurbonov 1999 yilda O‘zbek milliy kurashi bo‘yicha birinchi Jahon chempioni unvoniga, 2010 yilda Pekin (Xitoy) shahrida o‘tkazilgan Butunjahon jang san’ati "Sport Akkord" o‘yinlarining oltin medaliga sazovor bo‘ldi. Shu kafedra o‘qituvchisi Eldor G'ulomov jangovar sambo bo‘yicha birinchi Jahon chempioni bo‘ldi.

Akademiyada Osiyo sambo federatsiyasi (OSF) muvaffaqiyatli faoliyat ko‘rsatib kelmoqda. Uning prezidenti jismoniy tayyorgarlik kafedrasining boshlig'i, pedagogika fanlari nomzodi, professor F. Po‘latovdir.

O‘quv dargohining moddiy-texnik bazasini bugungi kun talabi darajasiga keltirish yo‘lida ham ko‘plab ishlar qilindi. Jumladan, hududda joylashgan barcha bino va inshootlar zamonaviy qilib kapital ta’mirdan chiqarildi: ko‘rkam bog' hamda gulzorlar, archa-zorlar yaratildi, devor va arka shakldagi darvoza inshootlari qurildi, kirish-chiqish nazorat punktlari qayta qurildi.

Tinglovchilarning fanlarni o‘zlashtirish darajalarini reyting tizimida baholash, STTOKga qabul qilinuvchi nomzodlarni imtihon qilish maqsadida Test markazi tashkil etildi va zamonaviy kompyuterlar bilan ta’minlandi. Shuningdek, ma’ruza zallari ta’mirlanib, tegishli mebel, multimedia vositalari bilan jihozlandi, auditoriyalarda sun’iy iqlim va ventilyatsiyani ta’minlash uskunalari o‘rnatildi. Axborot resurslari markazini yaratish maqsadida umumiy va maxsus kutubxona hamda ularning filiallari tashkil etilib, mebel, kompyuter vositalari bilan jihozlandi.

Toshkent avtomobillar halqa yo‘lidagi 2,85 gektarli qarovsiz yer Akademiya tasarrufiga o‘tkazilib, keng miqyosli kapital-ta’mirlash ishlari bajarilgach, o‘quv auditoriyalari, kafedra va bo‘limlar uchun xonalar barpo etildi. Toshkent avtomobillar halqa yo‘li, Do‘rmon yo‘li ko‘chasi kesishgan yerda joylashgan tashlandiq holda yotgan qurilish besh qavatli ma’muriy va o‘quv xonalariga ega binoga aylantirildi.

Akademiya shaxsiy tarkibining hordiq chiqarishi va dam olishi uchun sharoit yaratish maqsadida hududga tutash joydan oqib o‘tuvchi Qorasuv daryosi bo‘yidagi qarovsiz yotgan bo‘sh yer o‘zlashtirilib, «Orom» choyxonasi barpo etildi.

O‘quv dala markazida ham keng qamrovli bunyodkorlik ishlari amalga oshirildi: barak tipidagi eski kazarmalar o‘rnida sovuq va issiqdan saqlovchi yangi tipdagi to‘rtta zamonaviy shinam modul-kazarmalar bunyod etildi. 650 nafar shaxsiy tarkibga mo‘ljallangan oshxona, ma’ruza zali, sinfxonalar, taktik shaharcha, harbiy mashqlar bajariladigan saf maydoni qurilishi ham istiqlol sharofatidandir.

Serjantlar tarkibini tayyorlash bo‘yicha oliy kurslari uchun Akademiya hududida to‘rt qavatli ikkita bino ajratilib, ular zamon talablari asosida o‘quv xonalari va yotoqxonaga aylantirildi. O‘quv binosida STTOK tarkibiga kiruvchi bo‘linmalarning xonalari, auditoriyalar va kutubxona zaruriy o‘quv jihozlari bilan jamlangan.

Akademiya tinglovchi va kursantlariga zamonaviy tibbiy xizmat ko‘rsatish maqsadida muolaja, bog'lov, stomatologiya, jarrohlik, terapevt, fizoterapiya, lazaret va boshka xonalar to‘liq zamonaviylashtirildi. Shu bilan birga, aloka vositalari - 400 abonentga mo‘ljallangan yangi raqamli ATS ishga tushirilgan.

Intizor ko‘chasida qarovsiz holda yotgan, chala qurilgan 4 qavatli bino Toshkent shahar hokimining qarori bilan Akademiya ixtiyoriga berilgach, rekonstruksiya ishlari qilinib, mehmonxona tashkil etildi. Hozir bu joyga xizmat yuzasidan tashrif buyurgan, shuningdek, IIV Akademiyasiga malaka oshirish, o‘qish maqsadida kelgan ichki ishlar idoralari xodimlari va xizmatchilari, tinglovchi, kursantlarning ota-onalariga sifatli xizmat ko‘rsatilmoqda.

Bir so‘z bilan aytganda, istiqlol tufayli mazkur o‘quv dargohi ham jamiyatimizga yetuk huqukshunos-kadrlar tayyorlab berish sohasida o‘z yo‘li va aniq maqsadiga ega bo‘ldi. Ichki ishlar sohasida olib borilayotgan tub islohotlar tufayli uning poydevori yanada mustahkamlanmokda, maqsadga yo‘naltirilgan istiqbolli rejalr qaror topmokda.

Sardor Razzoqov, podpolkovnik.

Abdusami Haqberdiyev.

"Postda" gazetasi, 2011 yil 13 avgust, № 33 (3926)