O'zbekiston Respublikasi IIV tizimidagi oliy ta'lim muassasalarida navbatdagi tantanali bitiruv marosimlari bo'lib o'tdi. Quyida ana shu tadbirlar haqidagi reportajlar bilan tanishtiramiz.

Respublika Ichki ishlar vazirligi Akademiyasi. Oliy ta'lim muassasasi hududiga kirishingiz bilan serviqor archalar va turfa gullar bo'yi dimog'ingizni qitiqlaydi. Bu yerdagi ozodalik, saranjomlik ko'ngillarga ko'tarinkilik bag'ishlaydi. Qo'lida dasta-dasta gullar ko'targan ota-onalar, o'g'li yoki qizini, yoshlar, jajji bolajonlar esa akalarini qutlashga oshiqishadi. Bu kun Akademiya to'rtinchi kurs tinglovchilari bitiruv marosimiga bag'ishlangan tantanasi bo'lib o'tadi.

Akademiya maydonida bayram libosida saf tortib turgan, hayajondan masrur bitiruvchilar ko'nglidan shunday so'zlar o'tgan bo'lsa ajab emas: «Vatanim! Mana men, sening farzanding, bugun xizmatingga shay bo'lib turibman. Sening har bir qarich tuprog'ing muqaddas, uni ko'zimga to'tiyo aylagum. Onajonim allasi haqqi, bergan non-tuzing haqqi senga sidhidildan xizmat qilgayman. Ishonchingni oqlayman, Vatan!».

Ma'lumki, mamlakatimizda Prezidentimiz Islom Karimov rahnamoligida kelajagimiz bo'lgan yoshlarning kamolini ko'zlab keng ko'lamli ishlar amalga oshirilmokda. Davlat dasturlarining hayotga izchil tatbiq etilishi, hukumatimiz tomonidan yoshlarga ko'rsatilayotgan g'amxo'rliklar, albatta, tahsinga loyikdir. Ayniqsa, ta'lim tizimida amalga oshirilayotgan ishlar ko'lami kengayayotir. Jumladan, zamon talablariga mos ta'lim dargohlaridan biri bo'lmish respublika Ichki ishlar vazirligi Akademiyasi ham el-yurt osoyishtaligini ta'minlash yo'lida mard va jasur yigit-qizlarni tarbiyalovchi yetakchi bilim maskanidir. Shu o'rinda aytish joizki, Akademiyada tinglovchilarning bilim olishlari, yetuk mutaxassis bo'lib yetishishlari uchun zamon talablarga javob beradigan moddiy-texnik baza yaratilgan. Bu yerda Davlat ta'lim standartlari asosida bitiruvchilarning tergov, tezkor-qidiruv, jinoyatlarning oldini olish, ekspert-kriminalistika mutaxassisligi bo'yicha jamiyatda fuqarolarning huquq va erkinliklarini himoya qilish, jamoat tartibini saqlash va xavfsizlikni ta'minlash, jinoyatchilikka qarshi kurash, shuningdek, huquqbuzarliklarning oldini olish sohasida xizmat faoliyatini amalga oshirish uchun zarur bo'lgan bilimlar beriladi. Akademiyada tinglovchilarning puxta bilim olishlari uchun barcha shart-sharoitlar yaratib berilganligi, o'quv-tarbiya jarayoniga o'qitishning ilg'or usullari joriy etilganligi, mashg'ulot xonalari, ma'ruza zallari zamonaviy o'qitish vositalari bilan jihozlanganligi ayniqsa e'tiborga sazovordir.

... Nihoyat hayajonli damlar boshlandi. O'zbekiston Respublikasi Ichki ishlar vaziri, general-leytenant B.Matlyubov, vazirlik rahbariyati, Akademiya boshlig'i vazifasini bajaruvchi, polkovnik T.Saitbayev va boshqa mehmonlar minbarga ko'tarilishdi.

Akademiya o'quv kurslari boshlig'i, polkovnik A.Abdurahmonov Ichki ishlar vaziri, general-leytenant B.Matlyubovga shaxsiy tarkib tantanali tadbirga saflanganligi to'g'risida axborot bergandan so'ng barcha orziqib kutgan diplom topshirish tantanasi boshlandi. Bitiruvchilar birin-ketin safdan chiqib, ustozlari oldiga diplomlarni qabul qilish uchun kela boshlashdi. Diplomlarni qabul qilib olarkan, «O'zbekiston Respublikasiga xizmat qilaman» deb baralla aytayotgan yigit-qizlarga, shodiyonaga kelganlar havas bilan boqayotganini sezish qiyin emas.

Shundan so'ng general-leytenant B.Matlyubov nutq so'zladi. Vazir o'z so'zida O'zbekiston Respublikasi Prezidenti va hukumati, Ichki ishlar vazirligi rahbariyati tomonidan vazirlik ta'lim muassasalarida malakali mutaxassis kadrlarni tayyorlash masalasiga alohida e'tibor qaratilayotganini aytib o'tdi. U bitiruvchilarga yurtimiz osoyishtaligi yo'lida mashaqqatli, shu bilan birga, sharafli xizmat faoliyatlarida muvaffaqiyatlar tilar ekan, jumladan, shunday dedi:

- Aziz bitiruvchilar! Siz nufuzli oliy ta'lim muassasasini tamomlab, endilikda fuharolarimizning huhuq va erkinliklarini himoya qilish, yurtimizda tinchlik va osoyishtalikni ta'minlashdek sharafli ishga yo'l olmokdasiz. Mana shunday hayajonli dahihalarda Siz, aziz farzandlarimizning yorug' chehrangizga bokib, biz - ota-onalar, ustoz-murabbiylar sizlarning timsolingizda vujudidan kuch-g'ayrat yog'ilib turgan, o'z oldiga yuksak mahsadlar ko'yib, yangi dunyoharash, yangi tafakkur bilan hayotga kirib kelayotgan, biz boshlagan ishlarning davomchisi bo'lgan barkamol avlodni ko'ramiz va bundan yuragimiz quvonch hamda g'ururga to'ladi. Zero, safimizda siz kabi g'ayratli, shijoatli, vatanparvar yoshlarimiz bor ekan, yurtimiz, xalqimiz istiqboli hamisha ishonchli ko'llardadir.

Maydon uzra O'zbekiston Respublikasi Davlat madhiyasi yangrab, jangovar bayroq olib kirildi. Shundan keyin so'z olgan jamoatchilik vakillari bitiruvchilarni unutilmas kun, ajoyib shodiyona bilan qizg'in muborakbod etdi. Akademiya professor-o'qituvchilari nomidan so'zga chiqqan kafedra dotsenti vazifasini bajaruvchi, mayor Muzaffar Ziyodullayev bitiruvchilarga muvaffaqiyat tiladi. Ota-onalar nomidan so'zga chiqqan Muhabbat Xudoyberganova barcha yigitlarni bildirilgan ishonchni oqlashga chaqirdi. Leytenant Bekzod Bozorov ta'lim bergan ustoz-murabbiylarga bituruvchilar nomidan minnatdorlik izhor qildi.

Akademiya Oliy akademik kurslari bitiruvchilariga «Jinoyatchilikka qarshi kurash va jamoat xavfsizligini saqlashni boshqarish tashkilotchisi» kvalifikatsiyasi berilganligi haqidagi diplom hamda Akademiyani a'lo baholarga tamomlab, o'rnak ko'rsatgan tinglovchilarga respublika Ichki ishlar vaziri tomonidan imtiyozli diplomlar topshirildi.

Yosh ofitserlarni ota-onalari, yaqinlari gullar bilan olqishlab tabrikladilar. Fursatdan foydalanib, quvonchdan shodon ota-onalar, bitiruvchilar va ularning yaqinlarini suhbatga tortamiz.

- Bugun barchamiz uchun unutilmas va quvonchli kun, - deydi Toshkent shahrilik bitiruvchi, leytenant Jamshid Saidov. - Qalblarida Vatanga muhabbat, burchga sadoqat tuyg'ulari jo'sh urib turgan barcha bitiruvchi tengdoshlarimga yurtimiz osoyishtaligini ta'minlashdek mas'uliyatli vazifalarni sharaf bilan ado etishlarida muvaffaqiyatlar tilayman.

- Men ushbu dargohda ekspert-kriminalistika yo'nalishi bo'yicha o'qib, kerakli bilim va ko'nikmalarga ega bo'ldim, - deydi Qoraqalpog'iston Respublikasi Nukus shahrilik bitiruvchi, leytenant Baxtigul Askarova. - Ichki ishlar vazirligi Akademiyasida tahsil olganimdan faxrlanaman. Kelgusida bu yerda olgan bilimlarimni amaliyotda qo'llab, yurt osoyishtaligiga hissa qo'shish niyatidaman.

- Nevaram Sherzodbek Shermatov shunday nufuzli ta'lim muassasasini bitiryapti, - deydi quvonch bilan Namangan viloyati Norin tumanidan kelgan O'ktamxon aya Dehqonova. - Martabasi baland bo'lsin, el-yurtning koriga yarasin, saboq bergan ustozlari, ota-onasining yuzlarini yorug qylsin, deya duo qilaman.

- Zafarjon beshinchi farzandim, - deydi ko'zlariga sevinch yoshlari quyilib kelayotgan Buxoro viloyati Qorako'l tumanidan kelgan Sharif aka Hakimov. - Yoshligidan shu kasbga qiziqdi. Mana bugun mutaxassislik diplomini qo'lga oldi. O'g'lim xalqiga, Vataniga sadoqat bilan xizmat qilsa, mendan baxtli ota yo'q.

Barchaning yuzida tabassum, kimdir jigar-bandini qutlab, quchoqlagan, yana kimdir yaqiniga gul tutgan. Ota-onalar o'g'il-qizlarining kamolini ko'rib turganligidan ko'zlaridagi sevinch yoshlarini yashira olishmadi.

"Postda" muxbiri

“Postda” gazetasi, 2010 yil 3 iyul, № 27 (3868)