Mamlakatimizda ichki ishlar idoralari tizimining tubdan takomillashtirilgani, sohani malakali kadrlar bilan to‘ldirishga qaratilayotgan e’tibor samarasida yurtimiz tinchligi va xalqimiz osoyishtaligi yanada mustahkamlanmoqda.

Prezidentimiz Islom Karimov tashabbusi bilan tashkil etilgan O‘zbekiston Ichki ishlar vazirligining akademiyasi Serjantlar tarkibini tayyorlash oliy kursi ham ana shu ezgu maqsadlarga xizmat qilayotir. Mazkur kursni bitirgan yuzlab serjantlar bugun ichki ishlar idoralarida jazoni ijro etish, yong‘in xavfsizligi, yo‘l-patrul, patrul-post xizmati, xorijga chiqish-kelish va fuqarolikni rasmiylashtirish, qo‘riqlash va boshqa xizmatlarda samarali faoliyat ko‘rsatmoqda.

Bu yerdagi zamonaviy kompyuter va lingafon, jangovar-taktik mashg‘ulotlarni o‘rgatish, sport mashqlari olib borish xonalari kursantlar ixtiyorida. O‘qitishning samarali usullari, multimedia va zamonaviy axborot texnologiyalaridan keng foydalanilmoqda.

O‘zbekiston Ichki ishlar vazirligining akademiyasi Serjantlar tarkibini tayyorlash oliy kursining navbatdagi bitiruvchilariga diplom topshirish marosimida bu alohida qayd etildi.

Tadbirda O‘zbekiston ichki ishlar vaziri, general-leytenant B.Matlyubov, akademiya boshlig‘i vazifasini bajaruvchi, polkovnik T.Saidboyev, Oliy kurs boshlig‘i, polkovnik S.Tangirberdiyev, bitiruvchilarning ota-onalari nomidan so‘zga chiqqan M.Akbarova va boshqalar davlatimiz rahbari rahnamoligida yurtimizda huquq-tartibotni mustahkamlashning muhim bo‘g‘ini bo‘lgan ichki ishlar idoralari tizimini isloh qilish borasida keng ko‘lamli ishlar amalga oshirilayotgani o‘z samaralarini berayotganini ta’kidladi. Bugun ichki ishlar xodimlarining ma’naviy barkamol, jismoniy baquvvat, o‘z kasbining yetuk ustasi bo‘lib yetishishi uchun barcha sharoit yaratilgani buning dalilidir.

– Yurtimiz tinchligi va osoyishtaligini saqlash har bir fuqaroning muqaddas burchidir, – deydi bitiruvchi Shohsanam Mahkamboyeva. – Bu sharafli burchni kasb sifatida tanlagan biz, yoshlarga mazkur jarayonda yanada ulkan mas’uliyat yuklanadi. Men buni doimo qalban his etib, elu yurtimizga sadoqat bilan xizmat qilaman.
 

N.Abduraimova

O‘zA, 30.03.2011