IIV akademiyasi kursantlari uchun poytaxtimizdagi Adiblar xiyobonida sayyor darslar tashkil qilindi.

O‘zbek tili va xorijiy tillar kafedrasi tashabbusi bilan o‘tkazilgan mavg‘ulotlar yoshlarni adabiyot olamiga yanada yaqinlashtirish, ularning ma’naviy dunyoqarashini yuksaltirish, serqirra ijodi bilan xalqimiz qalbidan joy olgan shoir va yozuvchilarimizning ibratli faoliyatini targ‘ib qilishda muhim ahamiyat kasb etdi.

Bir hafta mobaynida kursantlar “Cho‘lpon – erk va adolat kuychisi”, “Adabiyot nadir?”, “Qodiriyning so‘nggi kunlari”, “Usmon Nosir hayoti va ijodiga bir nazar”, “Ufqqa tutash tog‘day jasorat”, “Ruhiyatni yoritgan she’riyat”, “Zahiriddin Bobur ijodida yurt sog‘inchi” kabi mavzularda ma’ruzalar tingladilar.

She’riyatga ixlosmand yoshlar ishtirokida o‘tgan bahru baytlar, muloqot va munozaralar adiblarimiz ijodidan teranroq bahramand bo‘lish, adabiyotning millat ma’naviyatini tarbiyalashdagi beqiyos qudratini his qilish imkonini berdi. Zero, ma’rifatparvar bobomiz Abdulhamid Cho‘lpon aytganidek, adabiyot yashasa – millat yashaydi.

IIV akademiyasi Axborot xizmati