ИИВ академияси курсантлари учун пойтахтимиздаги Адиблар хиёбонида сайёр дарслар ташкил қилинди.

Ўзбек тили ва хорижий тиллар кафедраси ташаббуси билан ўтказилган мавғулотлар ёшларни адабиёт оламига янада яқинлаштириш, уларнинг маънавий дунёқарашини юксалтириш, серқирра ижоди билан халқимиз қалбидан жой олган шоир ва ёзувчиларимизнинг ибратли фаолиятини тарғиб қилишда муҳим аҳамият касб этди.

Бир ҳафта мобайнида курсантлар “Чўлпон – эрк ва адолат куйчиси”, “Адабиёт надир?”, “Қодирийнинг сўнгги кунлари”, “Усмон Носир ҳаёти ва ижодига бир назар”, “Уфққа туташ тоғдай жасорат”, “Руҳиятни ёритган шеърият”, “Заҳириддин Бобур ижодида юрт соғинчи” каби мавзуларда маърузалар тингладилар.

Шеъриятга ихлосманд ёшлар иштирокида ўтган баҳру байтлар, мулоқот ва мунозаралар адибларимиз ижодидан теранроқ баҳраманд бўлиш, адабиётнинг миллат маънавиятини тарбиялашдаги беқиёс қудратини ҳис қилиш имконини берди. Зеро, маърифатпарвар бобомиз Абдулҳамид Чўлпон айтганидек, адабиёт яшаса – миллат яшайди.

ИИВ академияси Ахборот хизмати