IIV akademiyasi boshlig‘i kunduzgi ta’lim 1-o‘quv kursiga qabul qilingan kursantlar bilan muloqot qildi.

Uchrashuvda mamlakatimiz hayotida ro‘y berayotgan keng ko‘lamli islohotlar, ichki ishlar organlari tizimidagi ijobiy o‘zgarishlar, soha uchun bilim va salohiyatli kadrlar tayyorlash yo‘lida amalga oshirilayotgan yangilanishlar, kursantlarning zamon talablari darajasida ta’lim olishi uchun yaratib berilayotgan ulkan imkoniyatlar haqida so‘z bordi.

Keyingi yillarda akademiyada ta’lim jarayonlari tubdan isloh qilingani, kursantlarning nazariy bilimini amaliy ko‘nikmalar orqali mustahkamlash maqsadida dual tizimda o‘qitish, hududiy ichki ishlar organlari bilan hamkorlikda mahorat darslarini tashkil etish, mashg‘ulotlarga xorijiy mutaxassislarni jalb qilish va boshqa yangiliklar keng joriy etilgani qayd etildi.

O‘quv dargohi rahbari Yangi O‘zbekistonning buguni va ertangi kuni yuksak bilimli yoshlar qo‘lida ekanligini, katta hayotga kirib kelayotgan yosh avlod vakillari ana shu mas’uliyat va ishonchni doimo his qilgan holda mamlakatimizning fidoyi kadrlari bo‘lishi kerakligini ta’kidladi.

– Akademiyada o‘qish har bir yigit-qizdan bilim, shijoat, vatanparvarlik va mardlikni talab qiladi. Sizlar Yangi O‘zbekistonning istiqboli porloq yoshlari sifatida ona Vatanimiz va xalqimizga sadoqat bilan xizmat qilishdek sharafli kasbni tanlagansiz. O‘qish davomida kasbiy bilim va amaliy ko‘nikmalarni puxta egallab, chinakam xalqparvar ichki ishlar organi xodimi bo‘lib shakllanishingiz zarur, – dedi akademiya boshlig‘i Rustam Xatamov.

Tadbirda yoshlarga zarur tavsiyalar berildi. O‘quv va xizmat intizomiga qat’iy rioya qilish har bir kursant faoliyatining kundalik mezoniga aylanishi kerakligi aytib o‘tildi.

IIV akademiyasi Axborot xizmati